سبا ویراں – ن م راشد

سلیماں سر بہ زانو اور سبا ویراں

سبا ویراں، سبا آسیب کا مسکن

سبا آلام کا انبار بے پایاں!

گیاہ و سبزہ و گل سے جہاں خالی

ہوائیں تشنۂ باراں،

طیور اس دشت کے منقار زیر پر

تو سرمہ ور گلو انساں

سلیماں سر بہ زانو اور سبا ویراں!

سلیماں سر بہ زانو ترش رو، غمگیں، پریشاں مو

جہانگیری، جہانبانی، فقط طرارۂ آہو،

محبت شعلۂ پراں، ہوس بوئے گل بے بو

ز راز دہر کمتر گو!

سبا ویراں کہ اب تک اس زمیں پر ہیں

کسی عیار کے غارت گروں کے نقش پا باقی

سبا باقی، نہ مہروئے سبا باقی!

سلیماں سر بہ زانو

اب کہاں سے قاصد فرخندہ پے آئے؟

کہاں سے، کس سبو سے کاسۂ پیری میں مے آئے؟